“SAMİR ŞƏRİFOV BUNLARI BİLMƏLİ İDİ…” – NAZİRİN İRADINA İQTİSADÇIDAN CAVAB

Saytla əlaqə: 994 50 295 94 79, aydinliqaz@mail.ru

“Mühafizəkarlıqları ilə seçilən beynəlxalq maliyyə qurumları ölkələrin kredit reytinqini konkret mərhələlər üzrə müəyyənləşdirirlər”.

Azərbaycanın maliyyə naziri Samir Şərifov “Standard & Poor’s”, “Moody’s” və Fitch kimi beynəlxalq reytinq agentliklərinin Azərbaycanın göstəricisini “BBB-“dən “BB+”-a endirməsinin səhv yanaşma olduğunu bildirib.

Maliyyə nazirinin beynəlxalq qurumlara yönəlik bu iradını Yenicag.az-a şərh edən iqtisadçı Əkrəm Həsənovun sözlərinə görə, nəzərdə tutulan qurumlar ölkələrin kredit reytinqini bəlli prinsiplər əsasında müəyyənləşdirirlər:

“Bu məsələdə naziri haradasa başa düşürəm. Çünki o, hazırda görülən işlərə – vergi və gömrük sahəsində həyata keçirilmiş dəyişikliklər, bank sisteminin sağlamlaşdırılması, problemli kreditlərin həlli istiqamətində atılan addımlar – əsasən, o fikirləri səsləndirib.

Ancaq bütün bunlar yeni görülmüş işlərdir və onları hələlik sadəcə, biz bilirik. Ona görə də hesab edirik ki, edilmiş dəyişikliklər avtomatik olaraq, Azərbaycanın kredit reytinqinə müsbət təsir göstərməlidir.

Lakin nəzərə almaq lazımdır ki, beynəlxalq reytinq agentlikləri belə qısa müddətdə qiymətləndirmə aparmırlar. Onlar daha mühafizəkar yanaşmaya üstünlük verirlər və qiymətləndirmə aparmaq üçün müəyyən dövrün keçməsini gözləyirlər. Bu mənada onları da başa düşmək olar.

Bu sadalananları nəzərə alsaq, nazir öz iradında tam haqlı deyil və qeyd olunan məqamları bilməli idi. Mən düşünmürəm ki, o, vurğulanan məqamlar haqqında məlumatsızdır.

Ona görə də hesab edirəm ki, nazirin bu iradı daha çox daxili auditoriyaya ünvanlanıb. Yəni baxın, biz bu qədər işlər görmüşük, ancaq beynəlxalq təşkilatlar buna qiymət vermirlər. Halbuki, ona da məlumdur ki, belə tez qiymət verilə bilməz.

Bununla belə hesab edirəm ki, həyata keçirilmiş dəyişikliklər qarşıdakı mərhələdə Azərbaycanın kredit reytinqinə müsbət təsir göstərəcək”.

www.yenicag.az

Related Articles

050-295-94-79
top