Şəkidə məmurlar qanunları necə pozur…

Saytla əlaqə: 994 50 295 94 79, yenilikaz@gmail.com

Şəkidə 2011-ci ildə sahibkar Hikmət Səlimovun intiharı, daha sonra isə buna səbəb olan vəzifəli şəxslərin həbsi ilə nəticələnən qalmaqallı əmlak mübahisəsi bitmir. Həmin hadisələrdən sonra həbslər aparılsa da, görünən odur ki, hələ də əraziyə iddialı olanlar var. 

Cebhe.info xəbər verir ki, Hikmət Səlimovun qohumu Əhmədov Əhməd Tələt oğlu hadisədən bir neçə il keçməsinə baxmayaraq, problemin hələ də qaldığını, həm özü, həm də ailəsinə ciddi narahatlıq yaratdığını bildirib. Onun sözlərinə görə, 1971-ci ildə Bakıda anadan olub. 1993-2000-ci illərdə polis orqanlarında işləyib. 2000-ci ildə polis orqanlarından ayrılıb və Müsavat Partiyasına üzv olmaq üçün ərizə verib. Daha sonra uzun müddət sahibkarlıq fəaliyyəti ilə məşğul olub. Yeni Yasamalda qapı-pəncərə sexi işlədib. Ancaq 2011-ci ildəki hadisədən sonra ailənin problemləri başlayıb. 

Söhbət Şəkidə sahibkar Hikmət Səlimovun intiharından gedir. Belə ki, İcra Hakimiyyəti başçısının 29 mart 2003-cü tarixli sərəncamı ilə şəhər sakini Səlimova Elfanə Hikmət qızına ayrılmış 30 kvadratmetr ərazidə atası Səlimov Hikmət Əhməd oğlu tərəfindən sahəsi 46,1 kvadratmetr olan mağaza və 49,6 kvadratmetr talvar inşa edilib: 

“Elfanə mənim qardaşımın həyat yoldaşıdır, torpaq sahəsi də faktiki olaraq onlara məxsusdur. 2011-ci ildə həmin ərazidə qanunsuz ticarətlə məşğul olduğunu əsas gətirərək mağaza sahibi, yəni qardaşımın qayınatası İnzibati Xətalar Məcəlləsinin 235-ci, həmçinin Şəki rayon Məhkəməsinin 25 yanvar 2011-ci il tarixli qərarı ilə həmin Məcəllənin 310-cu maddəsi ilə nəzərdə tutulan inzibati xəta törətməsində təqsirli bilinərək 20 manat cərimələnib. Bundan sonra İcra Hakimiyyətinin vəzifəli şəxsləri mağazaya gələrək onun uçurulması barədə tapşırıq verib və tapşırıq icra olunub. Bundan sonra qardaşımın qayınatası özünü Kiş çayının üstündəki körpüdən ataraq intihar edib. Bu hadisə uzun müddət müzakirə mövzusu olub, mətbuat yazıb, televiziyalar çəkib”. 

Həmin dövrdə hadisə ilə bağlı Baş Prokurorluğun yaydığı məlumatda deyilir: 

“3 fevral 2011-ci il tarixdə saat 10:00-da Şəki şəhər İcra Hakimiyyətinin vəzifəli şəxsləri – İcra Hakimiyyəti başçısının şəhər təsərrüfatı üzrə müavini Qəhrəmanov Eldəniz İlham oğlu, Şəki şəhər İcra Hakimiyyəti başçısı aparatının Tikinti və memarlıq şöbəsinin müdiri – şəhərin baş memarı Abdurahmanov Yusif Kamal oğlu xidməti səlahiyyətlərinin hüdudlarından açıq-aşkar kənara çıxan hərəkətlər edərək, Azərbaycan Respublikası Mülki Məcəlləsinin 180.4-cü maddəsinə əsasən tikinti məqsədləri üçün ayrılmayan torpaq sahələrində lazımi icazə almadan, şəhərsalma, tikinti normaları və qaydalarının ciddi surətdə pozulması ilə tikilmiş binaların, qurğuların, yalnız müvafiq icra hakimiyyəti orqanları və ya maraqlı tərəfin müraciəti üzrə məhkəmənin qəbul etdiyi qərar əsasında sökülməli olduğu halda, qeyd edilən tarixdə digər vəzifəli şəxslərlə birlikdə şəhərin Fuad Abdurahmanov küçəsində yerləşən Elfanə Səlimovaya ayrılmış ərazidə inşa edilmiş mağazaya gəlib. Vəzifə səlahiyyətlərini aşaraq müvafiq məhkəmə qərarı olmadan həmin mağaza və onun qarşısında tikilmiş açıq talvarın sökülməsi üçün Şəki Suvarma Sistemləri İdarəsinə məxsus, şəhər sakini Nəbiyev Qurbanəli Əsabəli oğlunun idarə etdiyi «Boreks 2102» markalı Az 55 T 579 dövlət qeydiyyat nişanlı traktor-ekskavatorla uçurulub-dağıdılması üçün qanunsuz göstərişlər verib”. 

Baş Prokurorluğun məlumatında o da vurğulanıb ki, həmin tikililərin bir hissəsi uçurulub:

“Bununla da fiziki şəxsin konstitusiya ilə nəzərdə tutulan hüquq və azadlıqlarını pozaraq, hakimiyyət orqanlarını nüfuzdan salmaqla, onların huquqlarına və qanuni mənafeyinə mühüm zərər vurulub. Eldəniz Qəhrəmanov və Yusif Abdurahmanovun əməllərində Azərbaycan Respublikası Cinayət Məcəlləsinin 309.1-ci (vəzifə səlahiyyətlərini aşma) maddəsinin əlamətləri olduğundan barələrində 4 fevral 2011-ci il tarixdə həmin maddə ilə cinayət işi başlanılıb”. 

Buradan da göründüyü kimi, Baş Prokurorluq tikilinin sökülməsində qanunsuzluğun olduğunu bildirib. Həmin ilin mayıda Şəki rayon İcra Hakimiyyəti başçısının müavini Eldəniz Qəhrəmanova 1 il 6 ay, Yusif Abdurahmanova isə 11 ay şərti cəza verilib:

“Qardaşım və həyat yoldaşı bundan sonra müxtəlif dövlət orqanlarına şikayət etdilər. Daha doğrusu, şikayəti qardaşımın qayınanası edirdi, qardaşım onun şikayətlərinin yazılmasında kömək edirdi. Onunla bərabər bacanağı da fəaliyyət göstərirdi, ancaq 2013-cü ildə bacanağı Qafarov Kamran Nəriman oğlu avtomobil qəzasında öldü. Maşınının üstündən “Kamaz” keçmişdi. Bundan sonra qardaşım tək qaldı. Ərazini qardaşımdan istəyirdilər, ancaq buna baxmayaraq, ərazidən imtina etmədi. Saxta ittihamla həbs etdirmək istəsələr də, məhkəmə həbs qərarı çıxarmadı. 2017-ci ildə qardaşım Azərbaycanı tərk etdi. Ərazi üzərində sərəncam vermək hüququ indiyədək qardaşıma məxsusdur. Buna görə də onu tapmayanda mənə və böyük qardaşım Əhmədov Elxana müraciət olundu. Ancaq məlumdur ki, biz heç birimiz həmin ərazi ilə bağlı qərar verə bilmərik”. 

Əraziyə iddalı olan şəxsin kimliyinə gəlincə, Əhməd Əhmədov bu barədə ona heç bir rəsmi məlumat verilmədiyini deyib: 

“Ərazini almaq istəyirdilər, heç tanımadığımız adamlar vasitəçi düşürdü, başa sala bilmirdik ki, torpaqla bağlı bizim qərar vermək haqqımız yoxdur. Torpaq bizim yox, qardaşımızındır. Qardaşımız ölkədə deyil, bizə deməz ki, sizin nə marağınız var ki, etibarnamə alırsız? Böyük qardaşım Elxan Əhmədov bu təzyiqlərə dözə bilməyərək ürək tutmasından Mərkəzi Klinik Xəstəxanada bu ilin mayında vəfat etdi. Bundan sonra tanımadığım şəxslər təkrar-təkrar mənə müraciət etdilər ki, Azərbaycanda olmayan qardaşımın həmin ərazidən imtinasıyla bağlı ərizəsini alım və onlara təqdim edim. Ancaq qardaşım Azərbaycanda yaşamırdı, mənim onunla görüşmək, ondan razılıq ərizəsi almaq imkanım yox idi. Bu proseslər baş verəndən sonra Yasamal rayonunda olan seximin fəaliyyəti də dayandırıldı. Deyilənə görə, bunu Yasamal rayonunun sabiq icra başçısı İbrahim Mehdyev tapşırıbmış. Beləliklə sexim də əlimdən çıxdı, fəaliyyət imkanım tam məhdudlaşdırıldı. Halbuki həmin sex 2000-ci ildən mənə məxsus olub. Bir nəfər intihar etdi, neçə nəfər mühakimə olunaraq şərti də olsa cəza aldı, qardaşım ailəsiylə başqa ölkəyə köçdü, amma bir neçə kvadratmetr toprağı hələ də hansı yolla olursa-olsun, almaq istəyənlər var”.
Cebhe.info

Related Articles

050-295-94-79
top