“İSTƏDİM Kİ, HƏRBİÇİLƏR SEKS AMİLİNƏ GÖRƏ KİTABIMI…” QALMAQALLI POLKOVNİK DANIŞDI

Əlaqə: 994 50 295 94 79, aydinliqaz@mail.ru

Xəbər verdiyimiz kimi, sosial şəbəkələrdə və KİV-də Fövqəladə Hallar Nazirliyinin (FHN) hərbi hissələrinə paylanılan kitab müzakirələrə səbəb olub. Kitabın müəllifi polkovnik-leytenant Əbülfəz Kazımov, adı isə “Mühərrik yağları konkret maşınlarda tətbiqi. Daxiliyanma mühərrikinin quruluşu. Yanma prosesi”dir. Maşın və mühərrik haqda olan kitabda kişi-qadın münasibətləri, cinsi həyat, seksual-dini məslələr yer alıb.

AYDINLIQ.AZ xəbər verir ki, məsələ ilə bağlı Unikal.org-a müsahibəsində kitabın müəllifi Əbülfəz Kazımov yazdığı fikirləri bu cür əsaslandırıb:

-“Mühərrik yağları konkret maşınlarda tətbiqi” adlı qalmaqallı kitabınızla bağlı məlumat verərdiniz?

– Kitab haqqında çox söz danışa bilərəm. Amma bu kitabı əldə edib, oxuyub, məlumatlansanız, sonra sizə burada yazdıqlarımı izah edə bilərəm. Kitabı oxumayanlar, haqqımda mənfi fikir söyləyirlər. Hamısı yalandır. Bir gün ərzində məni çox incitdilər.

– Kitabı əldə edə bilməyən və yazdıqlarınıza görə sizi təhqir edənlərə nə deyərdiniz?

– Mən Quran oxuyur, namaz qılıram. Düzdür, özümü dindar saymıram. Ancaq Allahın buyurduğu islam qaydalarına bacardığım qədər əməl edirəm. Mən kitabımda insanları islam əxlaqına səsləmişəm. Əsas məshəblərimdən biri bu olub. Uzun illərdir insanlar arasında işləyirəm. Bilirəm ki, insanlar ən çox nələrə maraq göstərirlər. Kitab müəllif kitabıdır. Nə lazımdırsa orada yazmışam. Bu kitaba heç kim qadağa qoya bilməz. Məni şərləyirlər. Bu, mənə atılan ilk böhtan deyil. Son bir neçə ayda mənə çoxlu böhtanlar atılıb. Mən elm adamıyam. Tarix elmləri namizədiyəm.

– Sizin bundan başqa kitablarınız var?

– Bəli, özüm 7 kitabın müəllifiyəm. Bundan əvvəl də iki kitabımda ədəbi mozaika janrından istifadə etmişəm. Bu 3-cü kitabımdır ki, sekslə bağlı fikirlərdən istifadə etmişəm. Mənə atılan böhtanlar kitaba görə deyil. Sadəcə düşmənlərim çoxalıb.

– Bu kitabları yazmağa sizin ancaq əxlaqınız məcbur etdi?

-Mən kitablarımda insanlara çox şeyi başa salmağa çalışmışam. Heyvanların adını çəkmişəm. Müqayisə elə, ay insan, sən hara gedirsən? Sən kimsən, vəhşiləşirsən? Adamlar elə hərəkət edir ki, görürsən ki, insanlar vəhşiləşməyə doğru gedir. Kitabımda bunu yazmışam da, ay qardaş.

– Bəs maşın yağı ilə seksin nə əlaqəsi var?

-Bax siz jurnalistsiz. Ədəbi mozaika deyilən bir janr var. Bu texniki kitab olduğuna görə sekslə bağlı fikirlər səsləndirmişəm. Məqsədim budur ki, kitabımı oxuyan adam darıxmasın və yorulmasın. Digər tərəfdən mən zabit kontingenti ilə çalışıram. Maxe, gizirlər onsuzda kitab oxumurlar. Onların maraqlarını mən bilirəm. Mən ona görə belə yazmışam ki, heç olmasa hərbçilər bu amilə görə kitabımı maraqla oxusunlar. Maşın yağı ilə seksin əlaqəsini də onların kitaba olan maraqlarının artması üçün yazmışam. Həmçinin, burada atalar sözləri, hədislərdən də istifadə etmişəm.

– Fövqəladə Hallar Nazirliyinin müvafiq qurumlarında bu kitablar dərslik kimi yığışdırılıb?

– Bu kitab dərslik üçün nəzərdə tutulmayıb, dərs vəsaiti deyil, müəllif kitabıdır. Kitabım bir aydır çapdan çıxıb. Ancaq yaxın tanışlara hədiyyə etmişəm.

– Məlumat yayılıb ki, Fövqəladə Hallar naziri Kəmaləddin Heydərov mediada və sosial şəbəkələrdə müzakirələrə səbəb olan kitabınızla bağlı sizi işdən azad edib. Bu barədə nə deyə bilərsiz?

-Xeyir, vəzifəmdən azad olunmamışam. Sadəcə olaraq mənə öz xoşumla məcburi ərizə yazdırmaq istəyirlər. Ancaq mən isə ərizə yazmaqdan imtina edirəm. Çalışırlar ki, məni razı salsınlar.

Related Articles

050-295-94-79
top