“SƏLİM MÜSLÜMOVUN HƏBSİ, HƏM DƏ SİYASİ QƏRAR OLACAQ”

Əlaqə: 994 50 295 94 79, aydinliqaz@mail.ru
  • 3
    Shares

İqtisadçı ekspert Natiq Cəfərli sabiq əmək və əhalinin sosial müdafiəsi naziri Səlim Müslümovun dövründə qurumda baş verən yeyinti halları ilə bağlı mətbuatda yayılmış məlumatlara münasibət bildirib.

AYDINLIQ.AZxəbər verir ki, ekspert “qafqazinfo”ya açıqlamasında qeyd edib ki, yeyintilərlə bağlı hələ ki, rəsmi açıqlamalar olmayıb: “Hesablama Palatasının açıqlamasında göstərilən rəqəm isə böyük deyil. Amma mətbuatda 100 milyonlar, 2 milyardlarla yeyintidən söhbət gedir. Ancaq bu rəqəmlər rəsmi qurumlar tərəfindən təsdiqini tapmayıb.

Ümumiyyətlə isə, hər hansı dövlət və hökumət orqanında yeyintilərin olması artıq təəssüf doğurmur. Yeyinti olmaması təəccüb doğurar. Əgər köklü yoxlamalar olsa, çox böyük ehtimalla, nazirlikdə son illər ərzində kifayət qədər yeyintilərin olduğu, qiymətlərin yüksəldildiyi aşkara çıxar. Çünki ən çox korrupsiya halları o zaman baş verir ki, nazirliklərə, hər hansı dövlət qurumuna müəyyən iş görmək lazım olsun. Onlar qurum üçün nəsə alırlar və ya yaxud təmir-tikinti işləri görürlər. Onun qiymətləri bəzən iki-üç dəfə şişirdilir. Büdcədən alınan pulun çox az bir hissəsi işə ödənilir, qalan hissə isə rəsmilər tərəfindən mənimsənilir. Çox güman ki belə faktların olması ehtimalı var”.

Səlim Müslümovun həbs edilməsinə gəlincə isə, N. Cəfərli deyib ki, cinayət işinin açılması tək hüquqi yox, həm də siyasi qərar olacaq: “Əgər doğrudan da ciddi problemlərin olduğuna yol açan bir addımlar atılıbsa, çox güman ki həbs və hüquqi məsuliyyətə cəlb edilmə ilə bağlı qərarlar verilə bilər. Bunu biz Azərbaycanın yaxın keçmişində də gördük. Belə ki, nazirlər və yüksək vəzifəli şəxslər həbs olunub. Bunların hamısı təbii ki, yoxlamaların nəticəsindən, verilmiş siyasi qərarlardan asılı olacaq”.

Sözügedən nazirlikdə yeyinti faktlarının həm də mənəvi məsələ olduğuna diqqət çəkən iqtisadçı bildirib ki, hər ailədən heç olmasa bir nəfər bu nazirliklə təmas edir: “Bu da ya təqaüdçü, ya da sosial müdafiə qrupunda olan şəxslər fonunda baş verir. Yəni, əhali ilə çox sıx təmasda olan nazirlikdir. Orada baş verən yeyintilər birbaşa az təminatlı təbəqənin payının yeyilməsidir. Bu çox ciddi psixoloji, mənəvi, hüquqi məsələdir”.

Related Articles

050-295-94-79
top